“Их 7” бүлгийн уулзалтад оролцсон төрийн тэргүүнүүдэд ган тогоруу бэлэглэжээ

Б.Бадамзул

Анд нөхдийн мэдээ

2023-05-23

     Японы Хирошима хотод болсон “Их 7” бүлгийн дээд хэмжээний уулзалтад оролцсон төрийн тэргүүнүүдэд 1945 оны бөмбөгдөлтөөс 10 жилийн дараа цацраг идэвхт бодисын улмаас үүссэн хүнд өвчнөөр нас барсан Садако Сасаки охины хийсэн цаасан тогорууны хуулбарыг ган төмрөөр хийж бэлэглэжээ. Тус бэлэг дурсгалын зүйлийг С.Сасаки охиныг нас барахад орных нь дэргэд байсан цаасан тогорууг бэлгэдэж бүтээсэн бөгөөд хамгийн сүүлийн үеийн технологийг ашиглан жинхэнэ хувилбарын цаасны үрчлээ, нугалаа бүрийг нарийн урлаж хийсэн байна. Мөн дээр нь “G7 Hiroshima” гэж бичсэн аж. Үүгээр зогсохгүй, өнгөрсөн баасан гарагт “Их 7”-гийн удирдагчид Энх тайвны дурсгалын музейд зочлох үед Фүмио Кишида тэдэнд С.Сасаки охины түүхийг ярьж өгсөн юм. Улмаар ган тогорууг "Их 7" бүлгийн гишүүдээс гадна Юн Сок Ёль, Нарендра Моди, Владимир Зеленский зэрэг урилгаар оролцсон бусад улсын төрийн тэргүүнүүдэд мөн дурсгажээ. Түүнчлэн С.Сасаки охины ах Масахирогийн охин, 52 настай Южи “Их-7”-гийн удирдагчдын түншүүдэд С.Сасакигийн хийсэн цаасан тогорууны заримаас бэлэглэсэн байна. Учир нь, өнгөрсөн жил Ф.Кишида Токио хот дахь оффистоо С.Сасакигийн үеэл Южиг хүлээн авч уулзахад тэрбээр ийм бэлэг бэлдэхээ хэлж байсан гэнэ. Мөн С.Сасакигийн төрсөн ах, Южигийн аав өдгөө 81 настай Масахиро "Удаан бодож байсан хүсэл минь биеллээ. Садакогийн хүсэл хил хязгааргүй гэдгийг ч мэдэрлээ” хэмээн сэтгүүлчдэд ярьжээ. 

Францын ерөнхийлөгч Эммануэл Макрон Хирошимагийн Энх тайвны дурсгалын музейгээс цаасан тогоруу түүж урдаа тавьсан байгаа нь.